কেতিয়াবা
কেতিয়াবা এনেকৈও ভাল লাগে,
এই ধৰক বাহিৰত বৰষুণ ,
আপোনাৰ বৰ বেছি এটা কাম নাই ,
কম্বল খন গাত মেৰিয়াই ওপৰত ফেন খন লগাই ...
আস !!
কেতিয়াবা
কেতিয়াবা এনেকৈও ভাল লাগে,
এই ধৰক আপোনাৰ মনটো ভাল লাগি আছে ,
বহুত দিন ধৰক আপোনাৰ ভাল লগা মানুহ এগৰাকীৰ খবৰ লোৱা হোৱা নাই ,
আপুনি ঘপহকৈ তেওঁৰ মেছেঞ্জাৰ বা হোৱাটচ আপৰ দুৱাৰত টুকুৰিয়াই ,
কিবাকিবি চুপতি মাৰোঁতেই কেনেকৈ যে সময় বোৰ পাৰ হৈ যায় ...!
হা হা
কেতিয়াবা
কেতিয়াবা এনেকৈও ভাল লাগি যায় ।
এই ধৰক আপোনাৰ প্ৰেয়সীক লগ নকৰা এক সপ্তাহেই হ'ল,
তেনেতে চিনাকি ৰিংটনটো বাজি উঠিল ,
"ক'ত আছে '?
ব্যস্ত নাই যদি যাব পাৰিব নেকি এপাক ?"
তাৰ পিছত কফি দুকাপ ,
দুহাতত হাত ,
আৰু নিজানত কিছু ঘন ঘন উশাহ !!
আস !
কেতিয়াবা
কেতিয়াবা এনেকৈও ভাল লাগি যায় ।
এই ধৰক বৰষুণ জাক ঘপহকৈয়ে আহিল ,
আপোনাৰ হাতত ছাতি এটা আছিল যদিও ,
মেলিবৰ মন নগ'ল ,
অলপ সময় আপুনি ভাবিলে ,
চুই নিয়া বৰ্ষা ধুই নিয়া মোৰ সমস্ত বিষাদ ,
চেঁচা পৰশেৰে জীপাল কৰি আঁতৰাই দিয়া জীৱনৰ
সমস্ত অভিশাপ ।
কেতিয়াবা আপোনাৰ এনে নালাগে নে ,
চৰাইবোৰ পৃথিৱীৰ আটাইতকৈ সুখী ,
ফুল বোৰেই আটাইতকৈ ধুনীয়া ।
কেতিয়াবা আপোনাৰ পাহাৰৰ
ওপৰৰ ডাৱৰ খিনি ধৰিবৰ মন নাযায়নে ,
ক'ৰবালৈ যোৱাৰ সময়ত
খিৰিকীৰে চাই থকা পৃথিৱীখন আটাইতকৈ মনোমোহা যেন নালাগেনে ?
আচলতে কেতিয়াবা কেতিয়াবা এনেকৈ ভাল লাগে ,
কি কি কাৰণে জীয়াই আছো ভাবি ,
কিমান ভাল লগাবোৰে যে আছে বিয়পি ।
কিয় নাজানোঁ
কেতিয়াবা এনেকৈয়ে ভাল লাগে নিজানত
মোৰ এই সংগতি বিহীন কথাবোৰ ভাবি ।
যিবোৰ বুজাবলৈ অলপ কঠিন ,
মাথোন এনেকৈ অনুভৱ কৰিব পাৰি ,
কেতিয়াবা !!!
প্ৰাণজিৎ বৰুৱা
২০/৪/২০১৬
No comments :
Post a Comment