নীলা খামৰ চিঠি
মৰমৰ সোন ...
কেনে আছা বাৰু ? আশা কৰিছো
কুশলেই আছা হয়তো ।
মনে কৈছে ভালেই থাকিবা সদায় মোৰ শুভকামনা যিহেতু আছেই তোমাৰ সৈতে সকলো সময়ত ।
বাৰু
জানা নাজানা
ফাগুন পাওঁ পাওঁ হৈছেহি আকৌ ,
তোমাৰ প্ৰিয় ৠতু বুলি যে কৈছিলা মনত আছেনে ?
নে প্ৰিয় বস্তু বোৰ ক্ষণ স্থায়ী হৈ পৰে তোমাৰ আজিকালি ...
হি হি
যিহেতু এদিন মইয়োটো বৰ প্ৰিয় আছিলোঁ তোমাৰ ...!!
বাৰু বাদ দিয়া
তুমি আগৰ দৰেই আছানে চিত পখিলা জনী হৈ । দৌৰি ফুৰা ,
সৰু সৰু ল'ৰা পোৱালি ,
ছোৱালী বোৰৰ লগত খেলি ফুৰা ।
আৰু লগৰ কেইজনীৰ লগত লগ হৈ পদূলি মুৰত ৰৈ ল'ৰা জোকোৱা তোমাৰ সেই প্ৰিয় কামবোৰ কৰিয়ে আছানে আজিকালিও ।
নে বাদ দিলা ,
ব্যস্ত হৈ পৰিছা নেকি কাৰোবাৰ লগত !!
হবও পাৰা তোমাক ভালপোৱা মানুহ টো অসংখ্য আছে মইয়েটো নহয় মাত্র ।
বাৰু বাদ দিয়া
জান তোমাৰ হাঁহিটো বহুত দিন শুনা নাই অ,
কান উনাই আছো কৰবাত কেনেবাকৈ শুনো বুলি পিছে নুশুনোৱেই চোন সেই চিনাকি মাত কতো ।
যেতিয়াই কৰবাত যাওঁ মোৰ চকুৱে তোমাকে নজনাকৈয়ে বিচাৰি ফুৰে । কৰবাত কোনো গাভৰু দেখিলেই তুমি বুলি ভাবি মন উৰা মাৰে ।
কি কৰিম বাৰু কোৱাচোন ...
ইমানেই কিয়নো বাৰু মনলৈ আহা তুমি,
শয়নে সপোনে কিয় ভাঁহা তুমি ...
এইয়া গধূলি হলেই নিসংগ হৈ পৰিলেই মনটো উৰা মাৰি যায়,
উফাৰত এতিয়া পাপনৰ
মন মোৰ উৰি যায় বাজি আছে ,
আমাৰ দুয়োৰে প্ৰিয় গান আছিল যে এইটো ।
মনত আছেনে ,
গানটো শুনিয়েই
আজি তোমালৈ বৰ বেছি মনত পৰিছে অ...
আজি বুলিয়েই নহয় তোমালৈ মনত নপৰাকৈ হয়তো মোৰ এটা দিনো যোৱাই নাই ।
বুজিছা
সোণ
মোৰ
মনত অহা কথাবোৰ মই অকলে আৰু বলে নোৱাৰা হৈছো সেইয়ে এইয়া তোমাৰ লগতে ভগাই লওঁ বুলি হাতত কলম তুলি ললো ।
পিছে কিনো লিখো ভাবিয়েই পোৱা নাই দেখোন , ইমানবোৰ কথা কবলৈ আছে শুধিবলৈ আছে একো এটাই ভালকৈ কব নোৱাৰা হৈ গৈছো ।
কি জানো হৈছে নাজানো ...!!
জানা ,
আজিকালি তোমালৈ মনত পৰিলে মোৰ আকৌ চকুলো বোৰ নোলাই আগৰ দৰে,
হয়তো শক্তিশালী হৈ পৰিছে হৃদয় ।
হয়তো শুকাই গৈছে অভিমানী চকুলো !
নাজানোঁ যি হৈছে ভালেই হৈছে দিয়া ।
ভগৱানে কাৰো বেয়া নকৰে এইটোৱেই বিশ্বাস লৈ ফুৰিছো ।
শুনিছিলো কাৰোবাক বেছি গুৰুত্ব দিলে হেনো তেওঁৰ পৰা পোৱা গুৰুত্ব কমি যায় ।
হয়তো মোৰ ভুলো সেইটোৱেই হৈছিল তোমাক যে নিজতকৈও ভাল পাইছিলো...
...
...
হু...!!
ধেৎ আকৌ আবেগিক হৈ পৰিছো চোন ।
নাই নাই মই বহুত কষ্ট কৰি নিজকে আকৌ ভাল পাব খুজিছোঁ । এইবোৰ আকৌ নুলিয়াও দিয়া ।
দুৰ্বল হোৱাৰ ইচ্ছা নাই ।
বাদ দিছো ।
বাকী তোমাক কব লগা বহুতেই আছে ।
ইয়াত নকওঁ দিয়া এতিয়া ।
তোমাৰ খবৰ জনাবা পাৰিলে ।
আৰু কিবা কেনেবাকৈ যদি মোৰ অলপমানো প্ৰয়োজন হয় মোক মনত পেলাবা দেই নিসংকোচে ,
মই সাজু আছো সদায় তোমাৰ সকলোবোৰ বিপদ মুৰ পাতি লবলৈ । মাত্ৰ এবাৰ কৈ চাবা ।
ভাল দিনত মনত নেপেলালেও অন্ততঃ দুখ হলে কবলৈ নাপাহৰিবা...
তুমি দুখী হোৱাটো সহ্য কৰিব নোৱাৰিম অ জান সঁচাকৈয়ে কৈছো ।
আৰু মোৰ আশীষ আছেই যেতিয়া
তোমাৰ একো বেয়া নহয়ো দিয়া ।
চিন্তা নকৰিবা !!
...
আৰু অতি সোনকালে তোমাৰ উত্তৰ পাম বুলি বাট চাই ৰলো ।
বাৰু
নিশাও এতিয়া বৰ গহীন হৈ আহিছে
আজিলৈ
ইমানতেই এৰিছো দেই সোণ,
কুশলে থাকিবা
সদায়,
মৰম দিলো এবুকু !!!
ইতি
তোমাৰ মৰমৰ
পি বি !!
--প্ৰাণজিৎ বৰুৱা
৯-২-২০১৫
No comments :
Post a Comment