• ফাগুন আৰু ভালপোৱাৰ তিনিটা স্তৱক... •
(১)
ফাগুনত পলাশ ফুলে,
মদাৰফুলে আৰু কি ফুলে জানা ?
আৰু ফুলে দুখ,
ফাগুনৰ বতৰত সেউজীয়া হৃদয়খনত
ৰঙা ৰঙা নিসংগতাৰ অসুখ !!
(২)
ফাগুনত চিলা উৰে, পাত সৰে,
উৰে শুকান ধূলি...
আৰু ??
আৰু উৰে এখন চিঠি,
মৰমৰ কলম ভালপোৱাৰ চিয়াঁহীৰে
যিখন লিখিছো তোমালৈ বুলি...!
(৩)
ফাগুনত নামে লিগাং
উৎসৱ উৎসৱ সুৱাস লৈ,
আহে পচোৱা
ভালপোৱাৰ সোঁৱণশিৰি হৈ ।
ফাগুন মানেই যেন প্ৰেমৰ বান্ধ ভাঙে,
ৰঙীন ফাঁকু খেলে ফাগুনে...
আৰু ??
আৰু মোৰ জবাফুলীয়া মৰমবোৰো উৰে ফাগুনত
এটা ভালপোৱাৰ কবিতা হৈ ।
ණ প্ৰাণজিৎ বৰুৱা
৫ মাৰ্চ ২০১৫
No comments :
Post a Comment