কাম কৰা ছোৱালী ...
কাম কৰা ছোৱালীৰ বেমাৰ নাই,
কাম কৰা ছোৱালীৰ ভাগৰ নাই,
নাই যে নাই কাম কৰা ছোৱালীৰ বিহু পূজা একোৱেই নাই,
কাম কৰা ছোৱালীয়ে মাথোঁ যেন কাম কৰিহে ভাল পাই,
কাম কৰা ছোৱালীয়ে আৰু কি ভাল পাই?
মালিকনীৰ গালি খাই ,
মালিকৰ কামুক ইংগিত বোৰ,
চুৰি কৰাৰ অপবাদ বোৰ ,
নিশ্চয় ভাল পাই !!
কাম কৰা ছোৱালীয়ে পঢ়া শুনা কি নাজানে ,
জানে মালিক মালিকনীৰ ভিতৰুৱা আৰু বাহিৰৰ মুখ দুখনৰ আঁৰৰ মুখ ,
কাম কৰা ছোৱালীয়ে ভাল খাদ্য ভাল পোছাকো নিবিচাৰে,
মাহেকৰ শেষত ঘৰলৈ পইচা পঠিওৱাটোৱেই
তাইৰ অনাবিল সুখ ।
কাম কৰা ছোৱালীৰ ভায়েক ভনীয়কলৈ বৰ মৰম ,
সেয়ে কাম কৰোঁতে পাহৰি যায় কি শীত কি গৰম ।
কাম কৰা ছোৱালীৰ খবৰ লবলৈ কোনো নাই ,
পিছে তাইৰ অভাৱতেই ঘৰ এখন হৈ পৰে অসহায় ।
কাম কৰা ছোৱালীৰ দোষ নাই দোষ নাই,
কাম কৰা ছোৱালীৰ দেউতাকেই যে খুউব বেছিকৈ মদ খাই ।
কাম কৰা ছোৱালীৰ দোষ নাই দোষ নাই ,
দাৰিদ্ৰই কোঙা কৰা ঘৰ খনিনো তাই কি সতে চাই ।
আচলতে কাম কৰা ছোৱালীৰ দোষ এটাই ,
জন্ম গত ভাৱেই বৰ দুখীয়া তাই ...
পিছে মালিক সকলে এটা কথাই পাহৰি যায় ,
দুখীয়া হলেও কাম কৰা ছোৱালী তেজ মঙহৰেই মানুহ ,
আৰু মানুহ হোৱাটোত কাম কৰা ছোৱালীৰ অলপো দোষ নাই ,
কাম কৰা ছোৱালীৰ সেয়ে সকলোলৈ এটাই অনুৰোধ
অনুগ্ৰহ কৰি সুবিধা পালেই কাম কৰা ছোৱালীৰ ওপৰত
জন্তুৰ দৰে নপৰিব ,
নপৰিব জপিয়াই ।
সকলোৰেই যে জীয়াই থকাৰ অধিকাৰ আৰু মন এটা থাকে ,
যদিও কোনো লোক কোনো কোনো ক্ষেত্ৰত জীৱনত তেনেই অসহায় ।
✍প্ৰাণজিৎ বৰুৱা
১৬/০১/২০১৬
No comments :
Post a Comment