ছ'ৰি
(১)
আকাশত মেঘ কজলা কজলা ,
বসু মিস্ত্ৰীৰ ঘৰৰ ছাল উৰুখা ,
বসু মিস্ত্ৰীৰ ঘৈণী দৈৱকী সন্তান সম্ভৱা ।
কলিৰ কানাই উপজিব নে ঢুকাব ,
উৎকন্ঠা ।
আকাশে এৰি দিলে শিলাবৃষ্টি ...
দৈৱকীক ৰক্ষা কৰিব নোৱাৰি ধৰ ফৰাই বসু মিস্ত্ৰী ।
বৰষুণ দিয়াৰ বাবে বৰুণ দেৱতাই আৰু
উৰুখা ছালৰ বাবে পত্নী পুত্ৰ হেৰুৱাই
বৰুণ আৰু বসুৱে সমস্বৰে কয় ছ'ৰি ছ'ৰি ...
(২)
তাই অলকানন্দা গোস্বামী ,
পি এইচ দিৰ গৱেষিকা ছাত্ৰী ,
তেখেত ডাঃ অলক দাস ,
অলকানন্দাৰ ভাবী পতি ...
গল্প গুজৱ ওলাই ,
অলকানন্দাই অজাতিক ভালপাই
বংশৰ নাম নুমুৱাই ।
অলকাৰ মাকে সমাজৰ ভয়তে
অলকাক নিলগাই পঠিয়াই
চকুলো টোকি কয়
আই ছৰি ,
তোৰ মুখ চাব বোলে নাপাই ।
অলকাই হুক হুকাই ।
ধৰ্ম জাতি জনজাতি সকলোৱেই সমস্বৰে দাঁত নিকটাই চিঞৰে
ছ'ৰি ছ'ৰি ।
[৩]
ৰুগী জনৰ পইচা নাই ,
ডাক্তৰ জনে কয় ছ'ৰি ।
আপোনাৰ জীয়াই থকাৰ আৰু এতিয়াৰ পৰা অধিকাৰ নাই ।
(৪)
প্ৰেমিকে কয় চাকৰি এটা পোৱাই নাই ,
প্ৰেমিকাই কয় ছ'ৰি
তুমি মোক আৰু ভালপোৱাৰ প্ৰয়োজন নাই ।
(৫)
নিবনুৱাক টোপ দি
নিযুক্তিৰ বজাৰ এখন বঢ়ে ।
দৰ দামৰ তুলাচনীত দিগ্ৰী বোৰ ওপৰলৈ
আৰু পইচা বোৰ তললৈ হাউলী পৰে ।
টকাই ভেঙুচালি কৰি কয় ।
আপুনি পুনৰ এবাৰ বেলেগত
চেষ্টা কৰক
ছ'ৰি ।
...
.....
........
এনেদৰেই উফৰি উফৰি আহে যৰে তৰে পৰা
ছ'ৰি বোৰ ।
কোনোবাই মাক দেউতাকক বৃদ্ধাশ্ৰমত থৈ
ভগৱানকে আকৌ কয় ছৰি ।
কোনোবাই কাৰোবাৰ হৃদয় খন মোহাৰি থৈ
সহজে কয় সুখেৰে থাকা তুমি , ছৰি ।
ছৰি ছৰি ছৰি ...
আস !
জীৱনত অসভ্য হৈ পৰি ।
জানি বুজি অলেখ ভুল কৰি
সভ্য হৈ পৰাৰে যেন এটা ক'লা আখৰৰ শব্দ
ছৰি ।
সকলো পাপ কৰি ,
পুন্যবান হবলৈ আওৰোৱা ,
মুৰত লোৱা,
যেন বাস্তৱৰ সেই প্ৰদুষিত সেই গংগা জলেই
হ'ল ছ'ৰি ।
হা হা অসভ্য সকলো কৰ্মৰ সুন্দৰ মুখা খনৰ নামেই যে আচলতে
ছ'ৰি ।
✍প্ৰাণজিৎ বৰুৱা
২১/০২/১৬
No comments :
Post a Comment