ভালপোৱা
(১)
ডাষ্ট বিন খুচৰি পোৱা
দুখন ৰুটিৰ এখন সামৰি পুতেকে লৈ যায়,
ঘৰত বেমাৰী মাক ভোকত ,
তাকে দেখি
মাকৰ দুগালেদি
মৰম অলপ বৈ যায় ।
ভালপোৱাৰ উমত ।
(২)
২৫ বছৰীয়া পুতেক সোনকালে শুই যায়,
৬৫ বছৰীয়া বাপেকে টোপনিৰ পৰা উঠি
দেখে
পুতেকৰ নিষ্পাপ মুখ ,
ততাতৈয়াকৈ তেওঁ
পুতেকৰ বিচনাৰ আঠুৱা খন লগাই যায়
উপভোগ কৰে
ভালপোৱাৰ অনাবিল সুখ ।
(৩)
গ্ৰীস্মৰ দুপৰীয়া এটাত
বৃদ্ধ ভিক্ষাৰী জন আহে ,
গিৰিহঁতক পানী এগিলাচ খুজে,
গিৰিহঁতে শীতল চৰবত এগিলাচৰ
সতে জলপান এভাগ আগবঢ়াই ,
ভিক্ষাৰী জনৰ মুখৰ উজ্জ্বলতাই
গৃহস্থক সুখী কৰি তোলে ।
ভালপোৱা এনেকৈও ফুলে ।
টোকা :-
এনেকৈয়ে
ভালপোৱাই চুই যায়
প্ৰতিটো মনক প্ৰতিটো ক্ষণত ,
আৰু সৰি থাকে
নিয়ৰৰ দৰেই প্ৰতিটো প্ৰভাতত
জীৱনৰ দুবৰি বনত ।
প্ৰাণজিৎ বৰুৱা
২০/০৭/২০১৬
No comments :
Post a Comment