বৰষুণৰ স্নেপছট
(১)
বৰ্ষা তাইৰ নাম ।
সেইদিনা ৰাতিপুৱা বৰষুণ এজাক আহিল ,
তাই বৰষুণ জাকৰ চৈধ্য পুৰুষ উজাৰি গালি পাৰিল,
তথাপি
বৰষুণ জাক অভিমানী নহল,
এৰি পেলালে ক্ষন্তেকতে ,
হয়
বৰষুণ জাকে ঠিকেই বুজিলে
বৰষুণ দিলে বৰ্ষাৰ দেউতাকে
সেইদিনা আৰু বিচাৰি নাপাব হয়তো দিন হাজিৰাৰ কাম ।
(২)
বৰষুণ জাক হঠাৎ জোৰেৰে নামি আহিল,
লগে লগে পানী খিনিও বাঢ়ি আহিল,
বানত বুৰি যাব যেন
এতিয়াই চহৰখন,
ইফালে তাকে দেখি উৎফুল্লিত সৰুকনৰ মন ,
পানীত যে ৰিক্সা খনে আজুৰি আনে অসহায় মহানাগৰিকৰ অহংকাৰী ধন !!
(৩)
বৰষুণ জাক পৰোঁ কি নপৰোঁ হওঁতেই ,
কবিতাৰ লাইন লাগি গল ফেচবুকৰ দেৱাল খনত,
বৰষুণ নহয় যেন সোণ,
ইমান ভালপোৱা ।
আচলতে সেইটো নহবও পাৰে ,
ভাৰ্চুৱেল পৃথিৱীৰ সৰহ সংখ্যক কথাই দেখোন ভুৱা ।
বৰষুণ ৰ প্ৰেমিক হোৱাটোও হয়তো এটা ষ্টেটাচ ,
বাৰিষাৰ ৰাতি তোমাৰ কবিক অৰুন্ধতী এটি লাইকেৰেই মনত পেলোৱা ।
প্ৰাণজিৎ বৰুৱা
৮/৯/২০১৬
No comments :
Post a Comment