ভাল লগা শব্দৰ শাৰী...
বৰষুণৰ সংগীত বোৰ
যি বোৰ খেৰৰ চালত পৰিলে হয়
সেইবোৰ ভাল লাগে,
বাঁহ গছৰ সুৰ বোৰ,
যি বোৰ অলপ বতাহ বলিলেই হয়,
সেইবোৰ ভাল লাগে ।
ভাল লগাৰ কোনো দাবী নাই,
কিয় ভাল লাগে তাৰো
কোনো যুক্তি নাই,
সেইবাবেই
চুঙাত এটকা এটা ভৰালে ওলোৱা শব্দটো
ভাল লাগে ।
নদীখন বৈ যোৱা শব্দটো ,
বগলীজাক,
জাক পাতি উৰি যোৱাৰ � শব্দটো ,
আন নালাগে,
দেউতাৰ চাইকেলৰ কেৰমেৰ
শব্দটোও বৰ ভাল লাগে ।
আপোনাৰ কাণত বাজে নাবাজে নাজানোঁ ,
মোৰ কাণত কিন্তু অহৰহ এটি সৰু ল'ৰাই
কুঁহি পাঠ চিঞৰি পঢ়া ,
নেওতা মুখস্থ গোৱা,
কি ক'ত কিয় বিখ্যাত আদি
কৈ থকাবোৰে প্ৰায়েই খেদি থাকে ।
ল'ৰাটো কোন সঠিককৈ অৱশ্যে কব নোৱাৰি ,
কেতিয়াবা
নিজানত ,
কেতিয়াবা
কোলাহলত
হয়তো সকলো মানুহৰে ভাল লগাকৈ উফৰি আহে
এনেকৈ
ভাল লাগি যোৱা,
কিছুমান ভাল লগা শব্দৰ শাৰী... ।!!!
✍প্ৰাণজিৎ বৰুৱা
২/৭/১৬
No comments :
Post a Comment